बझाँ खौहे झौ यायेफुपिं
च्वमिः रमेश मान महर्जन
झी बाज्या पिनिसं बझाँ त्वँत्वंँ
कनाःतःगु छगू उखान दु
वा, फय्, मिं जुजुया विश्वास मदु
थौं कन्हय् नेतातय्गु नं छुं भाः मदु
छम्ह माकः दु छम्ह त्वाकः
छम्ह खाखः मेपिं ल्वाकः बाकः
हपँ ख्यानां फुकँ नयाःच्वँपिं इपिं
जुइ मखु इपिं आ याकः बाकः
साया घाः क्वखँ मस्यू धाई
वहे घालय् क्वातु क्वाई
वँ वैगु वँ वैगु बानी सिइका
भकुंग्वारा थ्वाय् थें थ्वाई
धुँ, भालु, चितुवाया न्ह्योने
छुँचाहे खः थ्व झीगु नेपाः
थौंकन्हय् व ममचा नैपिन्सं याना
व दक दिकहे म्येया कपा
धाइवले जनता तय्गु जनादेश धाई
अदालतय् वना मु्द्दा तयेगु याई
परमादेश नापनापं अध्यादेश हया
साम दाम दण्ड भेद प्रयोग याई
मौकाय् चौका ह्वायेगु स्वई
सोह्रय् एक्काहे साला काइ
२०५ प्रतिशत पूर्णाङ्क हया
संसदिय परीक्षा बोर्ड फस्ट है
उखे ८० प्रतिशत हःम्ह विचरा
सिमां कुतुुंवम्ह माकः थें जुई
थःहे पासां याना थःगु हे जिद्दी
न्वय् लाःगु फुकँ बँय् लाई
वँयेया देशये जक क्वेंँया जात्रा
गुन्हु पुन्हि धैगु गिजय् याइगु जात्रा
लः मदुगु पुखुली न्या फात्राफात्रा
छगू चम्चा वासःया छगू मात्रा
त्यात त्यात नेतात जक त्यात
न्हू न्हूगु पार्टित चायके दत
यः यःपिन्त यःयःगु पद विया
म्हुतु प्वाः तिकाः तये दत
ज्वज्वलपा धालकि लय्लय् ताई
बिचा हाय्के मालकि दुःख मन ताई
झीगु थ्व देश व पार्टिया पार्टिं जाई
बिचाः हाय्का भिन्तुना देछाई
गणतन्त्र धाःगु गन दु मस्यू
बहुदल धालकि सकसिनं स्यू
दलया दलं जागु थ्व देशय्
छगू दल जक हे गतिलागु मस्यू
सिन्के स्वया दंपिं नेतात
धेबा व पदया लागि न्ह्यागु याइपिं
लोभि व पापीत गन्ती मखा गन्ती खाकेत
कुनितिया खिपतं चिनाः तय्माःपिं
न्ह्यो मवःसाँ देने पहः याइपिं
ख्वाय् मखु इपिं न्हासं मताःपिं
लहिना तःपिं खिचात खनि
माया दया धैगु भ्याःहे मदुपिं
न्ह्याक होटेल तःसाँ नै भाय् मस्यूपिं
चिकेन रोष्ट वियर हुस्की हे माःपिं
म्हस्यूपिं खुँत इपिं ज्यान हे काइपिं
दरबारय् च्वना पजेरो हे गय्माःपिं
तँ प्वः झीके धन प्वः इमिके
जाःगु सिसिला खँकेहे मज्यूपिं
न्हासं चुया मिखां तिसिनासाँ
एमसिसि धाःगु पास यायेमापिं
लिइत्यः इपिं लिलाय् मत्यःपिं
संबाःगु जासिथल तछ्याय् माःपिं
त मज्यातले न्ह्यो मवः धकाः
खिचात ल्वाय्थें ल्वाय् माःपिं
न्याय, कार्य व ब्यवस्थापिका तकहे
थः थःगु मुठी तय्त स्वइपिं
राष्ट्रया सारा सम्पति दक हे
तहस नहस याय्त वंपिं
राष्ट्रिय पार्टीत दक्व मिलय् जुया
देश विकास याय्मा धाइमखुपिं
जिजक ज्यूसा देश हे मिया
प्वः प्वः थाक नयेगु स्वइपिं
खिचा, भौचा, च्वलय्चा व पैmचांहे
बां बां हुं हुं धाःगु स्यू स्व
उलिमछि सः स्यूपिं नेतातय्सं
थ्व झीगु देशया दुःख सुख मस्यू
आकासय् ब्वया जुइपिं नौ इपिं
तसकं पामुं बासिगु धौ इपिं
तु चिकं कयाः तःगु खौ इपिं
व बझाँ खौ हे झौ याय फुपिं
२०७८।०५।१६
No comments:
Post a Comment