२०६८/०१/१० शनिवार (२३ अप्रैल २०११) १९९ दिन मनयागु विष छ्यों तयाः जिगु जेल डायरी नेपालभाषां गथे च्वयाहयागु खः अथे हे थन न्ह्यब्वयाच्वना

२०६८/०१/१० शनिवार (२३ अप्रैल २०११) १९९ दिन 

मनयागु विष छ्यों तयाः जिगु जेल डायरी नेपालभाषां गथे च्वयाहयागु खः अथे हे थन न्ह्यब्वयाच्वना 

म्हिगः बहनि लिबाक द्यनागु जूसां थौं सुथय् ४ ताः इलय् न्ह्यलं चाल । च्वफाय् हथाय् जुल । मिखाय् न्ह्यःसू दनि अय्सां पिने वना च्वफाना वया । हाजं सिलखं फायाः द्यना । पलख मिखा तिसिना च्वना न्ह्यः वल ।

५ ताः इलय् नम्बर जुल । कालकुल हाःसः दत । जि न्ह्यलं चाल । पलख जायवं ‘नम्बर खुल्यो’ धाल । पिने वना झारा च्वना । ख्वाः सिला । द्यः भागी याना । थौंकन्हय् द्यः भागी मयाय्कं चित्त सुख मदय् धुकल । न्हापा ल्वहंया द्यः छु भागी यायेगु धाय्म्ह जि । थौं इलं जिगु विचाः जिगु मनस्थितिलय् ह्यूपाः हयाबिल । धर्म धइगु कमजोर मनस्थितिया उपज खः धाइगु धात्थें खःगु जुयाच्वन । जिगु उमेर व शारीरिक स्थितिं याना जिगु मनय् उत्साह, उमंग व हिम्मत म्हो जुयावन । अले संस्कार कथं दैवी चमत्कारया आसाय् द्यःप्रति आशक्ति अप्वया वन । कोथाय् वया कफी दय्का त्वना । भान्साय् वनाः क्वाःलः कया हया । मन धुक्क जुल अले पिने ग्राउण्डय् चाःह्यू वना । चाःहिला च्वंच्वं च्या त्वं वना । छगू पुरी विस्कुट ज्वनाः होटलय् वना । च्या त्वना । च्या त्वनाः च्वं च्वं न्ह्यःवःगु थें जुल । हानं कोथाय् वया सिलखं फायाः ग्वःतुला । पलख जाःबलय् ओमशान्ति भाइजी वःगु सूचं बिल । जित दनाः वने मंमन्त । ग्वःतुला च्वं च्वं न्ह्यः वल ।

च्याताः इलय् न्ह्यलंचाल । मुसुहुं नं प्वाः स्याना वल । झारा च्वं वना । याउँक झारा जुल । प्वाः नं याउँल । पलख पिने चाःहिला । कोथाय् वयाः कफी दयका त्वना । म्हिंगनिसें जिगु मन थासय् तये मफुत । जिगु कोथाय् छम्ह भाइ नाईके दु संजिव के.सी.(नां हिइकागु) वया उमेर हद दुसा नीदँ दत जुइ । वयात नं जवरजस्ती करणीया द्वपं बियाः मुद्दा तयाः पुर्पक्षया निंतिं थन छ्वयाः हयातःगु दु ।

व मचाया छेँय् बानेश्वरय् । वया बा मदय् धुंकल । मां व ततापिं निम्ह अले व । वया ततापिं निम्हं इहिपा याना भातयाथाय् वनेधुंकल । वया मांया जागिर दु । उकिं व मचा याकःचा छेँय् । व नं एस.एल.सी. फेल जुयाः स्कूल वनेम्वाःम्ह । वया छेँय् सिन्धुपाल्चोकया छगू परिवार निकू कोथा बालं कयाः च्वनाच्वंगु जुयाच्वन । इमि झिंप्यदँ दुम्ह छम्ह म्ह्याय् नं दु । व मचा व संजिवया दथुइ नतुसतु दु । व मिसा मचाया मेपिं मिजं मचातय्लिसे मतिना धाय्ला छु धाय्ला सम्बन्ध दु । छेँय् सुं नं मदइबलय् व मिसा मचां मिजंमचात ब्वनाः हयाः घण्टौं कोथाय् चुकू ग्वयाः तयाः तइगु । छन्हू व मिसामचाया कोथाय् चुकू तये ल्वमन जुइ । कोथाय् दुने आपतिजनक सः वःगु तायाः संजिबं खापा धिनाः स्वल । व मिसामचा पिनेयाम्ह छम्ह मिजंमचानाप द्यनाच्वंगु खन । संजिवयात खनेवं व मिजंमचा बिस्यूंवन । वं मिसामचायात ब्वबिल, छेँय्च्वंपिन्त कनाबी धाल । व मिसामचा ग्यानाः छेँय् सुयातं कनेमते बरु छँनाप द्यनेमाःसां द्यने वा धाल । वं मिसामचायात ब्वःबिल । आवंनिसें अजाःगु ज्या यानाः जुलकि छंगु जीवन स्यनी धकाः अर्ति बिल । संजिवं थ्व खँ थः मांम्हसित कन । व मिसामचां थः काय्यात स्यंकी धकाः ग्यानाः इमित डेरां पितना छ्वल । छुं दिं लिपा व मिसामचाया बाज्यां संजिवं वया छय्यात जवरजस्ती करणी यात धकाः प्रहरी रिपोर्ट बिल । प्रहरीं वयात ज्वना यंकल बयान काल । वं छुं यानागु हे मदु धाल । मिसामचाया शारीरिक जाँच यात । मिसामचाया कुमारी जाली गूगु दु धकाः डाक्टरी रिपोर्ट वल । प्रहरी व न्यायाधिशं संजिवयात  व मिसामचानाप इहिपा या धाल । जिगु मिखां खंक हे मेपिनिनाप द्यनेधुंकूम्ह मिसानाप इहिपा यायमखु धाल । अले वयात पुर्पक्षया निंतिं जेल चलान याना हल ।

अदालती कारवाही न्ह्यात । साक्षी प्रमाण छुं हे मदु । डाक्टरयात सःतल । यौन सम्पर्क जुयाः हे व जाली गूगु खःला धकाः न्या । डाक्टरं अदालतय् वया बयान बिल, “यौन संसर्ग जुयाः मिजं मचाया वीर्य स्खलन जूगु अजःगु छुं हे खनेमदु । कुमारी जाली धइगु फुटबल म्हिता, साईकल गयाः नं गुइफु ।”

उकिं वयात सफाई दइ धइगु वया मां सकसियां तःधंगु आशा दुगु खः । संजिव या नं सफाई दइ धकाः लयतानां अदालत वन । लिहाँवःबलय् छु जुल धकाः न्यनाः, “६ वर्ष कैद व २५ हजार जरिवाना न्यंकाः हल । अदालतय् हे वया मां ख्वया बेहोस जुल हँ ।

“बच्छि अंश दइधाःगु ग्वलय् ?” व मिसामचाया बाज्यां न्यन हँ ।

“कतःपिन्त जेलय् तयेधुंकाः अंश दइ ला ?” संजिवया वकिलं धाल हँ ।

थुकिं सी दु डेराय् च्वनीपिं मनूतय् पक्की छेँय् च्वनेगु म्हंगस खंकाः थ्व मुद्दा तःगु जुयाच्वन ।

व मिसा मचाया बयान बाहेक संजिवं जवरजस्ती यात धैगु छुं हे प्रमाण मदु । यदि प्रमाण दुगु जूसा संजिवयात झिंनिदँया कैद सजाय बिइगु । प्रमाण हे मदुसां संजिवयात खुदँया सजाय बिल । जिगु खँय् नं व मचातसें जाहेरी ब्यूगु बाहेक मेगु छुं प्रमाण मदु । खः हे मखुगु काल्पनिक घटनाय् नं प्रमाण गनं दइ ? उकिं जित सफाई दइ धइगु तःधंगु आशा दुगु खः । संजिवया थ्व फैसलां जित ख्यानाः बिल । जिगु मनय् ग्याःचिकु ब्वलन । संजिवयात थें मचातय्गु बयानया आधारय् जित नं खुलाया निंति जक सजायँ ब्यूसां जिगु सामाजिक, राजनीतिक जीवन ध्वस्त जुइगु जुल ।

जिगु मन गोलमाल जूगु मेगु नं छगू हुनि दु । संस्थाया मचातय्गु फीस बद्रीलालं पुलाः बिल हँ । मचात छम्ह म्हस्यूम्ह मखु । जित जाहेरीतपिं जिं फीस पुलेमते धयाछ्वयापिं सकसिगुं पुला बिल हँ । थथे हे मनय् खँल्हागुलिं जि म्हसुख मन्त ।

थौं नं न्हिनय् बजि नयेत खसिया ला दयेकाच्वन । जिमि प्यम्ह प्यम्हसिया निथ्व दयेकाः थौंया क्रिकेटय् सु त्याइ धकाः गोलाप्रथा तयाः बूम्हसें लाया दाँ पुलेगु यानागु दु । जिमित पंजाव टिम मेपिन्त दिल्ली टिम लात । कासाया ल्याखं पंजाव टिम बःला उकिं जिपिं त्याइ धकाः धुक्क जुयाच्वना ।

प्यताः इलय् बजि नया । क्वाःलः कयाः हया । झाराच्वने मास्तिवल । झारा च्वंवना । ह्वारारां झारा जुल । प्वाः याउँसे च्वन । म्हं झ्यातुल, सने हे मफु थें च्वन । कोथाय् वया ग्वःतुला । पलख जाःबलय् हानं झारा जुल । जि छु याये छु याये जुल । न्हय्ताः ईतकया दुने जि हरन्त हे जुइक झारा जुल । थौं बहनि जा नयेमखु धकाः मनय् धुन । आः वासः नलकि हानं निन्हू स्वन्हूतक झारा मजुइगु खः ला ? अथे धकाः वासः मनलकि तसकं झारा जुइगु खःला ? थ्वहे मतिं याना अस्पताल वना । थःगु खँ धया । अथेखःसा थ्व नरमगु वासः छचाः न धकाः नकल ।

वासः नयाः वया । च्याताः इलय् हे जि द्यना । क्रिकेट म्याच नं मस्वया । कोथाय् च्वंपिं पासापिन्सं, “बा, छु जुल ? अस्पताल वनेनु” धाल ।

“थौं जि म्हसुख मदु । अस्पताल वनाः वासः नयाः वयेधुन ।” जिं धया ।

थन जिगु च्यूताः काइपिं यक्व दु । जित मतिनायाइपिं नं दु । अथेखःसां थन च्वनेत जिगु मन लः लः मधाः । जिं न्ह्यःवयेका छ्वया ।