ओली प्रबृतिया चर्चा
नेपाःया राजनीतिइ इलय् ब्यलय् थीथी कथंया खँग्वःत चर्चाय् वयेगु याः । थ्व झ्वलय् थौंकन्हय् छगू चर्चा जुयाच्वंगु खँग्वः खः– ओली प्रबृति । प्रधानमन्त्री केपी शर्मा ओलीया शैलीयात कयाः थथे ओली प्रबृति धायेगु यानाहःगु खः ।
प्रधानमन्त्री ओली थौंया इलय् नेपाःया राजनीतिया केन्द्रविन्दु जुयाच्वंगु दु । वय्कः प्रधानमन्त्री पदं राजीनामा बियादीसां हाकनं प्रधानमन्त्री जुयादीगु, अले विपक्ष दलजक मखु थःगु हे पार्टीया असन्तुष्ट पक्ष तकं विपक्षलिसे जानाः वंसां मग्यासे थःगु हे कथं न्ह्याः वनाच्वनादीम्ह खः । थःगु विपक्षीयात बेवास्ता यानाः थःगु हे कथं न्ह्याः वनेगु अले मदिक्क देय्या धवः पन्यु थःगु ल्हातय् लाकातयादीम्ह छम्ह राजनीतिक खेलाडी खः ओली ।
नेपाली कांग्रेसया वागमती प्रदेश सांसद नरोत्तम बैद्यं प्रदेश संसदय् हे न्ववायेगु झ्वलय् प्रधानमन्त्री ओली विरुद्ध आक्रमक जुया नाथुराम गोड्से जुइत तकं तयार धयादीगु अले लिपा उकियात कयाः क्षमा फ्वना ओली प्रबृतिया विरोध यानागु जक खः धकाः न्ववानादीगु दु । थुकिं हाकनं छकः ओली प्रवृतिया बारे चर्चा जुयाबिउगु दु । ओली प्रबृति धकाः राजनीतिक दलया नेतातनिसें राजनीतिक विश्लेषकतय्सं न्ह्यथनेगु याना वयाच्वंगु दु ।
ओली प्रवृति धकाः सामान्यतयाः थःगु अडानय् च्वनादीम्ह, मेपिंत मतलब मयाइम्ह, थःगु पक्षय् दुम्हेसिगु निंतिं न्ह्यागु नं यायेत तयार जुयादीगु अले विपक्षयात मिखा बागलं तकं मस्वयेगु प्रवृति हे ओली प्रवृति धकाः धायेगु याना वयाच्वंगु दु । अथेहे सत्ताया धवः पन्यु थःगु ल्हातय् लाकातयेगु निंतिं वय्कलं याना वयाच्वंगु अनैतिक, असंवैधानिक ज्या याइगु शैलीयात हे ओली प्रवृति धायेगु याना वयाच्वंगु खनेदु ।
प्रतिनिधिसभा संसद ज्याख्यलय् मवल धकाः विघटन यानाः जनतायाथाय् वनेगु धकाः चुनावया घोषणा छकः जक मखु निक्व निक्व तक यानादीम्ह प्रधानमन्त्री केपी शर्मा ओली न्हापा न्हापा आदिवासी जनजातिप्रति बेक्वः मिखा दुम्ह धकाः म्हसीका वयाच्वंगु खः । तर लिपांगु इलय् वयाः महन्थ ठाकुरया नेतृत्वया पार्टी जसपायात लय्तायेकेगु नितिं न्ह्यागु हे सहमति यायेमाःसां यायेत तयार जुयादीम्ह कथं नं म्हसीका दःवःगु दु ।
्आदिवासी जनजाति महासंघया प्रतिनिधिलिसे नापलायेत तकं तयार जुयामदीम्ह छम्ह जक प्रधानमन्त्री धकाः आदिवासी जनजातितय्सं थुइका वयाच्वंगु खःसा मधेसया ला विरोधी हे खः धकाः मधेसवादीतय्सं प्रधानमन्त्री ओलीयात थुइका वयाच्वंगु खः । तर लिपांगु इलय् थःगु प्रधान सत्रुया रुपय् माओवादी केन्द्रया नायः पुष्पकमल दाहालयात नालाः वय्कःया ल्यूल्यू वनीपिंं पार्टीया नेता व पार्टीतय्त तकं दुश्मन तायेकाः महन्थ ठाकुर पक्षयात थःगु लिक्क तयादीगु दुसा सरकारय् तकं यंकादीगु दु । प्रधानमन्त्री थुकथं थःगु बिचारं हे १८० डिग्री चाःहिलाः मधेस नेतातय्त सरकारय् यंकूगु नं ओली प्रवृत्तिया कारणं खः ।
प्रधानमन्त्री केपी शर्मा ओली निकट नेता पृथ्वीसुब्बा गुरूङं विश्वासया मत काये मफयेवं गण्डकी प्रदेशय् नेपाली कांग्रेसया नेतृत्वय् सरकार गठन जूगु दु । २०७४ या प्रदेशसभा निर्वाचनं वाम गठबन्धनयात न्यादँया सरकार चले यायेगु मान्यता बिउगु खः । उकिं गुरुङ नेतृत्वया उगु सरकार न्यादँ तक दयेमाःगु खः तर राजनीतिइ अथे मजुल । माओवादी केन्द्र, कांग्रेस व एमालेया हे झलनाथ–नेपाल पक्षयात तकं उखेपाखे हे छ्वयेवं अन्ततः कांग्रेसया नेतृत्वय् सरकार गठन जूगु खः । थ्व धइगु एमालेया अध्यक्ष केपी शर्मा ओली थःगु विपक्षतय्त छुं नं कथंया नापं तयेत तयार मजुइगु अले याकःचा हे जूसां न्ह्याः वनेगु प्रबृति दुगुलिं हे गण्डकी प्रदेशय् थःगु पार्टीया नेतृत्वया सरकार त्वःतेमाःगु अवस्था ब्वलंगु खः धकाः धायेफइगु अवस्था ब्वलंगु दु ।
एमालेया अध्यक्ष ओलीया कार्यशैलीया कारणं कन्हय् वना गण्डकी प्रदेश जक मखु मेमेगु प्रदेशय् नं उगु हे कथंया अवस्था मवइ धकाः धायेफइगु अवस्था मदु । लुम्विनी प्रदेशय् ला झण्डै झण्डै संघीय सरकारया थें हे हालत जूगु खः । अन सत्तापक्षया निंतिं तसकं मछिंगु अवस्था जूगु खः । तर ओली पक्षया शंकर पोखरेल हाकनं मुख्यमन्त्री जुयां हे त्वःतूगु दु । तर वय्कः हाकनं मुख्यमन्त्री जुयादीगुयात नं ओली प्रवृति हे धकाः ब्याख्या याःगु खनेदु । अथे हे संघीय सरकार व संसद विघटन गुगु कथं यानादिल नापं उकिं नेपाःया
राजनीतिइ गुगु कथं लिच्वः लानाच्वन अले आः राजनीतिया अन्तिम निर्णय याइगु निकाय हे न्यायलय जकं मखुला धकाः न्ह्यसः थनेगु अवस्था तकं वल । थ्व फुक्क प्रधानमन्त्री नापं एमालेया अध्यक्ष केपी शर्मा ओलीया कारणं खः धकाः मनूतय्सं धायेगु यानाहःगु दु ।
न्ह्यागु हे जूसां आखिर प्रधानमन्त्री नापं एमालेया अध्यक्ष केपी शर्मा ओलीया ल्हातय् हे नेपाःया राजनीतिया बल लानाच्वंगु दु । वय्कलं बल गुखे थ्वाना छ्वइ उखेपाखे हे वनीगु अवस्था ब्वलनाच्वंगु दु । आः वया संसद् विघटनया घटनायात कयाः सर्वोच्च अदालतया फैसला छु जुइ उकिया हे आधारय् नेपाःया राजनीति न्ह्याः वनीगु अवस्था दु । अले विभाजित जुयाच्वंगु एमाले छु जुइ धकाः सर्वोच्चया फैसलाया आधारय् जक क्वःजिइगु अवस्था दु । उकिं एमालेया अध्यक्ष केपी शर्मा ओली पक्ष व उखे वरिष्ठ नेता माधव कुमार नेपाल–झलनाथ खनाल पक्षं नं दाउ स्वयाच्वंगु दु । वागमती प्रदेशय् निगुलिं पक्ष छगू हे जुयाः एमालेया नेतृत्वया सरकार ल्यंका तयेत ताःलाःगु जूसां थ्व अल्पकालीन अवस्था खः । सर्वोच्चया फैसलाया आधारय् हे कन्हय्या दिनय् मेगु हे कथं एमालेया नेपाल–खनाल पक्ष वनेफुगु अवस्था दु । ओली पक्ष व नेपाल–खनाल पक्षया दथुइ सहलह जूसां, मिले जुइगु अवस्था वल धकाः धाःसां बाय् विभाजन हे जुइगु अवस्था वल धाःसां नं सासां चमबू–पाःसां चःमधं थें हे जुयाच्वनीगु अवस्था वइ । जब सर्वोच्चया फैसला वइ अबलय् जक निर्णायक अवस्था थ्यनी धकाः धायेफइ । उकिया नितिं ओली पक्ष व नेपाल–खनाल पक्षं थःथःगु दाउ कयाच्वंगु दु । अले उखे माओवादी व कांग्रेस जक मखु जसपाया उपेन्द्र यादव पक्षनिसें महन्थ ठाकुर पक्षं नं थःथःगु हे दाउ कयाच्वंगु दु । सर्वोच्चया फैसलाया हे आधारय् पार्टीतय्गु दथुइ कार्यगत एकता, मोर्चाबन्दी याना वनेगु तयारी यानाच्वंगु दु । संसद पुनस्थापन जूसां बाय् निर्वाचनय् वंसां नं मूल रुपं आः ओली पक्ष व ओली विपक्ष कथं राजनीतिक दलत धु्रविकरण जुया वनीगु अवस्था वइ । अले उगु इलय् गुगु कथं मोर्चाबन्दी जुइ उकिया हे आधारय् नेपाःया राजनीति न्ह्याः वनीगु अवस्था वइ ।
No comments:
Post a Comment